Cib Fim Rau Tsoom Zej Zog Tuaj Koom Tes
Rooj Sab Laj Rau Pej Xeem Tuaj Pab Tawm Tswv Yim
Saint Paul Public Schools tab tom npaj tswv yim rau xya xyoo tom ntej no thiab twb caw tsoom zej zog tuaj pab tawm tswv yim ua ntu zus los lawm. Zaum no yog zaum peb thiab yog zaum kawg rau nej tuaj pab tawm tswv yim rau qhov SPPS 2033 Strategic Plan no. Thov caw cov tsev neeg thiab tsoom zej zog tuaj qhia nej tej tswv yim ua zaum kawg ua ntej peb yuav muab txoj kev npaj no ua kom tiav.
Peb yuav muaj ib lub rooj sib tham tim ntsej tim muag nyob rau ntawm Harding High School hnub Tuesday, lub Tsib Hlis tim 12, thaum 5:30 p.m. Qhov kev sib tham no yuav muaj ua lus Askiv, Mev, Hmoob, Karen, thiab Somali. Thov caw txhua tus tuaj koom.
DAB TSI: SPPS 2033 Community Engagement Meeting
QHOV TWG: Harding High School, 1540 Sixth St. E., St. Paul
THAUM TWG: Hnub Tuesday, lub Tsib Hlis tim 12, thaum 5:30 tsaus ntuj
VIM LI CAS: Peb xav tau nej cov tswv yim pab rau SPPS qhov kev npaj rau xyoo 2033 ua ntej peb yuav muab qhov kev npaj SPPS 2033 Strategic Plan no coj mus rau cov tsav xwm kom lawv pov ntawv pom zoo rau thaum lub Xya Hli.
Kev soj ntsuam rau zej tsoom
Daim ntawv ntsuam xyuas no kaw lawm.
SPPS tab tom pib ua txoj hauj lwm tseem ceeb uas yog los tsim ib co tswv yim rau qhov SPPS 2033 Strategic Plan, uas yog ib daim phiaj qhia tias peb yuav ua yam twg ua ntej, yuav nqis peev li cas, thiab peb yuav tsom ntsoov rau yam twg mus rau ntau xyoo tom ntej. Peb xav kom daim phiaj no muaj cov tswv yim thiab kev cia siab ntawm txhua tus hauv peb lub zej zog. Vim li ntawd, peb yuav thov nej pab tswv yim ntau zaus ntxiv thaum peb npaj daim phiaj no.
Lub Ob Hlis ntuj uas nyuam qhuav dhau los no, peb tau muaj ob peb lub rooj sib tham online (nej mus saib tau qhov kev nthuav qhia nyob ntawm no ( saib kev nthuav qhia ntawm no ). Lub hlis no, peb thov caw nej rov qab tuaj nrog peb sib pab tawm tswv yim nyob rau ib qho kev soj ntsuam online. Yuav tsis muaj leej twg paub tias cov neeg teb cov lus soj ntsuam yog leej twg.
Cov Rooj Sib Tham Online Nrog Tsoom Zej Zog
Peb tau muaj ob peb lub rooj sib tham nrog tsoom zej zog hauv Zoom rau lub Ob Hlis xyoo 2026. Cov rooj sib tham ntawd tau muaj ua lus Askiv, Mev, Hmoob, Karen, thiab Somali. Peb tos txais txhua tus uas muaj feem xyuam tuaj koom thiab txhawb kom lawv xaiv lub rooj sib tham uas haum lawv lub sij hawm.
Cov rooj sib tham no twb dhau los lawm.
Pab Neeg Tawm Tswv Yim Rau Qhov Strategic Plan
Kev sau npe koom pab neeg tawm tswv yim kaw lawm.
Xees Phos Tsoom Fwv Tsev Kawm Ntawv (SPPS) tab tom pib ua ib txoj hauj lwm tseem ceeb uas yog yuav los npaj tswv yim rau lub luag hauj lwm los sis hom phiaj tom ntej. Txoj kev npaj no yuav qhia tias hauv paus tsev kawm ntawv yuav ua yam twg ua ntej, siv nyiaj li cas, thiab peb cov hom phiaj tseem ceeb rau ntau xyoo tom ntej no yog dab tsi. Txhawm rau kom txoj kev npaj no muaj tej uas peb tsoom zej zog cia siab thiab xav tau, peb tab tom nrhiav 15–25 tug neeg laus thiab 10–15 tug tub ntxhais kawm hauv theem siab ntawm SPPS School District nrog rau cov neeg lag luam thiab cov neeg koom tes hauv zej zog, los koom nrog peb pab neeg tawm tswv yim hu ua Strategic Plan Advisory Taskforce.
Daim Ntawv Tshaj Tawm Txog Kev Koom Tes Hauv Zej Zog rau Lub Tsib Hlis 12
