Rov Qab Mus Kawm Ntawv

SPPS Siv Nej Cov Kev Tiv Tauj Li Cas

Dua li qhov uas siv los ceeb toom rau nej thaum muaj xwm ceev, nej yuav tau txais ntaub ntawv los ntawm hauv paus tsev kawm ntawv, nej lub tsev kawm ntawv thiab nej tus me nyuam cov xib fwb hauv email, robocall thiab/los sis xa ntawv los rau xov tooj. SPPS ua hauj lwm nrog ntau qhov chaw uas muaj cov twj pab cuam, lawv los kuj yuav xa ntawv los rau nej hauv email thiab. Cov twj pab cuam no muaj xws li Peachjar, Schoology, Securly Home, Seesaw thiab Xello. Yog nej tsis xav kom xa ntaub ntawv los rau nej, nej muaj peev xwm hais kom txhob xa tuaj thaum twg los tau. Mus saib kom paub txog cov twj no ntxiv nyob rau ntawm spps.org/families .

Kev Mus Kawm Ntawv

Kev mus kawm ntawv tsis qhaj yog ib feem tseem ceeb ntawm cov tub ntxhais kawm txoj kev vam meej. Yog hais tias nej tus me nyuam mob, thov saib SPPS cov lus qhia txog kev mob nkeeg ntawm spps.org/studentwellness. Yog paub tias nej tus me nyuam yuav tsis tuaj kawm ntawv, thov ceeb toom rau nws lub tsev kawm ntawv kom ntxov li ntxov tau. Muaj qhia ntxiv txog kev mus kawm ntawv tsis tu ncua nyob rau ntawm spps.org/attendance . 

Kev Pab Zaub Mov Hauv Tsev Kawm Ntawv

Cov tub ntxhais kawm ntawv tuaj yeem tau txais ib pluas tshais thiab ib pluas su pub dawb txhua hnub kawm ntawv raws li Minnesota Free School Food Program. Yuav kom tsim nyog tau noj mov dawb hauv tsev kawm ntawv, cov tub ntxhais kawm yuav tsum noj zaub mov kom tiav, suav nrog txiv hmab txiv ntoo lossis zaub. Yog tias tus menyuam kawm ntawv tsis noj mov tag, lawv tus as-qhauj noj mov yuav raug them rau ib tus zuj zus.

• Tub ntxhais kawm noj tshais lwm ob: $3.25
• Tub ntxhais kawm noj sus lwm ob: $5.50
• Mis nyuj nkaus xwb: $0.50
• Cov nqi rau txhua yam khoom muaj qhia rau hauv spps.org/ns.  

Mus rau hauv schoolcafe.com/spps es tswj nej tus me nyuam tus account noj mov, saib seb nej tus me nyuam tiv nqi noj mov li cas, cov khoom uas siv los sib tov ua noj thiab kev qhia txog tej khoom uas noj muaj nuj nqis rau lub cev, thiab mus ua daim ntawv thov kev pab rau kev kawm uas hu ua Application for Educational Benefits.

Kev Zov Me Nyuam Ua Ntej thiab Tom Qab Lawb Ntawv

Discovery Club yog ib qho chaw zov me nyuam uas muaj kev lom zem thiab txhawb kev kawm rau cov me nyuam qib PreK txog qib 5. Qhov khoos kas no pab txhawb kev kawm thiab kev loj hlob ua ntej thiab tom qab lawb ntawv, rau cov hnub uas tsis muaj ntawv kawm, thiab lub caij ntuj so. Peb xav kom nej teev npe ntxov vim tsis muaj chaw ntau. Yog xav paub txog nqi, cov chaw nyob rau qhov twg, thiab kev sau npe los sis tos npe, mus saib hauv spps.org/discoveryclub los sis hu rau 651-632-3793.

Kev Kawm thiab Kev Ua Ub No Tom Qab Lawb Ntawv (Extracurriculars)

Ntau lub tsev kawm ntawv muaj kev txhawb ntxiv ua ntej thiab tom qab lawb ntawv, xam tas nrho kev ua kis las, kos duab thiab suab paj nruag, cov koom haum, chav kawm Extended Day for Learning (EDL) thiab ntau yam ntxiv. Yog xav paub txog tej yam uas muaj ua dawb thiab tej uas yuav tau them hauv SPPS Community Education rau lub caij tsis kawm ntawv, mus saib hauv spps.org/commed.

Kev Thauj Mus Los

Cov tub ntxhais kawm yuav tau txais ib tsab email qhia txog kev caij npav rau thaum lub Yim Hli xaus. Tsab email yuav qhia tias mus nce npav thiab nqis npav qhov twg thiab thaum twg. Thov mus ua ntej li tsib feeb rau ntawm qhov chaw nce npav. Tsis ntev tom ntej no, peb mam qhia ntxiv rau nej txog peb qhov app tshiab hu ua MyStop, uas siv los taug qab tsheb npav kom paub tias tsheb npav txog qhov twg lawm.

Kev Caij Cov Tsheb Metro Transit Hauv Zos

Cov tub ntxhais kawm feem coob uas kawm qib 9 txog 12 ntawm cov tsev kawm ntawv xws li nram no yuav tau txais pib caij cov tsheb Metro Transit dawb hauv zos mus kawm ntawv thiab rov los tsev: Creative Arts Secondary School, Gateway to College, Gordon Parks High School thiab Johnson Senior High School. Cov tub ntxhais kawm yuav tau txais pib caij cov tsheb Metro Transit hauv zos rau thawj lub lim tiam uas mus kawm ntawv. Cov tub ntxhais kawm mus thau (download) ib daim rau hauv lawv lub xov tooj, iPad los sis luam ib daim los siv ua ntej los tau nyob rau hauv spps.org/metrotransit .

Kev Nkag Internet Hauv Tsev

Muaj internet hauv tsev ua tej ntaub ntawv uas nqa tim tsev kawm ntawv los thiab rau tej lub caij uas yuav tau nyob hauv tsev kawm los sis tej lub caij uas huab cua tsis zoo es yuav tau kaw tsev kawm ntawv yog ib qho tseem ceeb heev. SPPS yuav pab kom cov tub ntxhais kawm thiab cov tsev neeg uas tsis muaj internet tau internet siv. Cov kev txuas kom muaj internet rau hauv tsev muaj xws li txo nqi rau qhov WiFi hauv tsev los ntawm Comcast Internet Essentials nrog rau qhov FCC Affordable Connectivity Program. Mus saib hauv qhov home internet access webpage kom paub ntxiv..

Cov Hnub Tsis Muaj Kawm Ntawv (Non-Instructional) thiab Cov Hnub Muaj Kawm Ntawv Online (E-Learning Days)

Yog tias huab cua tsis zoo tej zaum SPPS yuav tsis muaj kawm ntawv (non-insturctional day) los sis yuav muaj kawm online (e-learning day). Thawj ob hnub uas huab cua tsis zoo es SPPS tsis muaj kawm ntawv, cov tub ntxhais kawm yuav tsum tsis txhob mus kawm ntawv thiab yuav tsis muaj kawm online los sis e-learning. Tom qab tsis muaj kawm ntawv li ob hnub vim huab cua tsis zoo, tus Superintendent mam li txiav txim siab seb tsim nyog yuav muaj kawm online los sis tsis muaj kawm ntawv. SPPS mam kaw suab, sau ntawv hauv xov tooj thiab xa email los qhia rau nej yog tias muaj tej hnub uas yuav nyob hauv tsev kawm (e-learning) los sis yog tias tsis muaj kawm ntawv (non-insturctional day). Mus sau hauv spps.org/weather kom paub ntxiv.
 

Tub Ntxhais Kawm Txoj Cai & Kev Thaj Tsob

SPPS mob siab tsim cov tsev kawm ntawv uas muaj kev tos txais txhua tus tub ntxhais kawm kom pom lawv, paub lawv thiab saib lawv muaj nqis. Muaj txoj cai rau cov tub ntxhais kawm kom lawv yuav tsum tau txais yam uas lawv yuav tsum tau txais rau thaum lawv tuaj kawm ntawv thiab muaj kev thaj tsob nrog cov cai no. Xav kom cov tsev neeg mus nyeem phau ntawv qhia txog tub ntxhais kawm ntawv txoj cai thiab lub luag hauj lwm ntawm Rights and Responsibilities Handbook.

Txoj Cai Tswj Kev Siv Xov Tooj Ntawm Tes

Pib lub Cuaj Hli mus, peb yuav pib siv ib txoj cai tshiab los tswj txoj kev siv xov tooj ntawm tes. Qhov nov yog ua raws li lub xeev txoj cai. Feem ntau, ces yuav tsis pub siv xov tooj ntawm tes thiab tej twj hluav taws xob rau lub caij kawm ntawv. Cov tsev kawm ntawv theem siab mam li tsim sij hawm rau cov tub ntxhais kawm kom lawv siv tau xov tooj ua ntej thiab tom qab lawb ntawv, thaum mus ib chav rau ib chav thiab/los sis thaum noj sus. Nej tus me nyuam lub tsev kawm ntawv mam li qhia rau nej thiab nej tus me nyuam paub txog lawv cov txheej txheem siv xov tooj ntawm tes.