Kev Pab Cuam Lus

SPPS sau thiab khaws cov ntaub ntawv txog cov tub ntxhais kawm txhua xyoo rau hauv Infinite Campus, uas yog qhov system siv los sau thiab tswj cov tub ntxhais kawm cov ntaub ntawv xws li kev tso npe kawm, ntaub ntawv hais txog tus tub ntxhais kawm, chaw nyob, kev tuaj kawm, kev ntsuam xyuas, qhab nia, thiab ntaub ntawv txog kev qhuab ntuas.

Yuav ua kom raws li lub xeev thiab tsoom fwv txoj cai, txhua tus tub ntxhais kawm yuav tsum muaj daim ntawv nug txog hom lus lawv siv hauv tsev uas twb sau tiav lawm nyob rau hauv lawv cov ntaub ntawv. Daim ntawv no yuav tsum ua kom tiav rau thaum sau npe kawm ntawv.  

Niam Txiv/Tus Saib Xyuas: Hom Lus Uas Nyiam Siv

Lub Infinite Campus yuav taug qab seb cov tsev neeg nyiam siv hom lus twg ua kev sib txuas lus. Thaum sau npe kawm ntawv cov tsev neeg yuav teev tseg tias lawv nyiam siv hom lus twg, thiab yuav muab hloov kho txhua xyoo kom haum raws li hom lus uas cov tsev neeg nyiam.

SPPS muaj kev pab txhais lus rau cov tsev neeg uas xav tau. Nyob ntawm seb xav tau kev pab li cas, tiam sis cov kev pab muaj li hauv nov:  

• Tim ntsej tim muag: Txhais Lus Tim Ntsej Tim Muag: Hu rau tus txhais lus raws li teev tseg rau hauv ntaub ntawv thiab cov neeg ua hauj lwm hais ob hom lus uas tau kawm los  
• Kev Pab Txhais Lus Hauv Xov Tooj: Qhov Language Line 
• Video: Muaj Qhov Txhais Lus Language Line thiab On-Call Interpreters (OCI)
• Cov lus uas tsis tshua siv, SPPS mam li tiv tauj cov chaw txhais lus sab nraud raws li xav tau. 

Kev Tsim Nyog Ntawm Tus Neeg Txhais Lus

Txhua tus neeg txhais lus thiab txhais ntawv yuav tsum txawj txog lub hauv paus tsev kawm ntawv tus qauv thiab coj zoo. Yog tus neeg txhais lus tsis muaj daim ntawv pov thawj los sis kev kawm, lub hauv paus tsev kawm ntawv yuav npaj ib co kev kawm rau nws raws li hauv no:

• Kev Zais Npog - Tsis pub hais tej lus sib tham thiab lwm yam tawm
• Txhais Kom Yog -Txhais lus thiab ntawv kom raug thiab ncaj ncees
• Nyob Nruab Nrab- Tsis pub tuaj tog twg rau thaum txhais lus
• Cov Lus Siv Hauv Kev Kawm - To taub thiab txawj siv cov lus uas siv hauv tsev kawm ntawv kom raug

Yuav Ua Li Cas Thiaj Tau Txais Kev Pab Txhais Lus

Rau Cov Tsev Neeg

Cov tsev neeg muaj peev xwm thov kom cov neeg ua hauj lwm hauv tsev kawm ntawv nrhiav neeg txhais lus rau lawv.  

• Daim Npav Thov Kev Pab Txhais Lus (Language Access Cards): SPPS muaj ib daim ntawv rau cov tsev neeg sau thov kom muaj tus txhais lus. Cov tsev kawm ntawv muaj peev xwm nqa tau cov ntawv thov kev pab txhais lus uas muaj ua ntau hom lus no ntawm tsev kawm ntawv tus neeg ua hauj lwm tiv tauj tsev neeg.
• Cov paib uas hais tias “We can help you”: Cov paib no qhia rau txhua tus tias lawv muaj cai thov kev pab txhais lus los sis txhais ntawv. Cov paib ntawd muaj 10 hom lus uas siv ntau tshaj hauv SPPS kom cov tsev neeg paub tias muaj kev pab rau hom lus twg. Cov paib no kuj qhia tau tias puas muaj koj hom lus, kom cov neeg ua hauj lwm paub nrhiav tus txhais lus rau koj. Cov tsev kawm ntawv yuav tsum muab ib daim paib no tso rau hauv chav ua hauj lwm los sis ntawm lub rooj txais qhua nyob pem hauv ntej. 

Rau Cov Neeg Ua Hauj Lwm

Cov neeg ua hauj lwm yuav tsum nrhiav cov neeg txhais lus hauv daim On-Call Interpreter List

• Xav kom hu mus ua ntej li 24 rau 48-teev
• Yog tsis pom hom lus twg teev tseg rau hauv daim ntawv On-Call Interpreter List, ces txhais tau tias SPPS tsis muaj ib tug neeg hais hom lus ntawd ua hauj lwm. Yog xav tau ib tug neeg txhais ib hom lus uas tsis pom teev tseg rau hauv daim ntawv, ces cov neeg ua hauj lwm yuav tsum sau email mus rau Sara Reyes los sis sau rau hauv daim ntawv thov OCI Request Form.  
• Yog xav tau cov neeg txhais lus Mekas piav tes, tiv tauj Heather Holter ntawm heather.holter@spps.org

Cov Lus Ceeb Toom Tseem Ceeb

• Tsis pub cov tub ntxhais kawm, cov nus muag, phooj ywg los sis cov neeg ua hauj lwm uas tsis tau txais kev kawm txhais lus los ua tus txhais lus. Siv cov neeg uas tsis tau kawm txhais lus los txhais lus rau niam txiv thiab tsev kawm ntawv yuav ua rau muaj kev tsis sib to taub los sis txhais yuam kev.  
• Cov tsev kawm ntawv yuav qhia rau cov tsev neeg paub tias SPPS muaj kev pab txhais lus rau niam txiv thiab xib fwb cov rooj sib tham, yog lawv thov ua ntej.
• Cov neeg txhais lus uas hu tuaj thaum xav tau kev pab (OCIs) mas tsuas pub txhais lus xwb, tsis pub txhais ntawv.

SPPS muaj kev pab txhais ntaub ntawv thoob plaws rau hauv koog tsev kawm ntawv ua lus Hmoob, Xamalis, Mev, thiab Kasliam. Yog xav tau lwm hom lus, ces thov nug, SPPS mam li txhais raws li kev thov. Cov ntaub ntawv tseem ceeb ces yuav muab txhais ua cov lus uas cov neeg siv ntau tshaj ua ntej, raws li ntawm no (hom lus siv heev tshaj mus rau hom siv tsawg): Hmoob, Mev, Karen, Somali.

Kev Txhais Ntawv Hauv Website: SPPS siv Weglot los txhais cov ntaub ntawv hauv SPPS lub website ua plaub hom lus uas cov neeg siv ntau tshaj hauv peb koog tsev kawm ntawv. Cov tsev neeg muaj peev xwm mus nyeem tau tej ntaub ntawv hauv SPPS thiab tsev kawm ntawv cov website ua lus Askiv, Hmoob, Karen, Somali, thiab Mev. Yog xav hloov lus, nej xaiv tau hom lus uas nej xav nyeem hauv qhov xaiv lus los sis drop-down menu nyob rau saum toj ntawm lub website. 

Kev Txhais Cov Lus thiab Ntawv Xa Mus Rau Cov Tsev Neeg: SPPS siv Finalsite Messages XR thiab Smore los xa cov xov tseem ceeb mus rau cov tsev neeg los ntawm kev hu xov tooj tsis siv neeg, email, thiab ntaus ntawv hauv xov tooj ua tsib hom lus uas cov neeg siv heev tshaj plaws hauv peb koog tsev kawm ntawv. Cov cuab yeej no muaj peev xwm txhais tau lus tsis siv neeg. Txawm li ntawd los, cov kev txhais lus ntawd tsuas yog siv los pab xwb, tsis yog los hloov cov kws txhais ntawv thiab cov neeg txhais lus uas kawm tawm los. Cov neeg ua hauj lwm yuav tsum siv cov cuab yeej txhais lus no ua ib qho kev pab ntxiv rau cov kws txhais ntawv thiab cov neeg txhais lus xwb, tsis yog siv los hloov lawv.

Thaum xav tau kev txhais lus tib hnub ntawd los sis thaum muaj xwm txheej ceev (xws li muaj mob los sis teeb meem txog kev qhuab ntuas), SPPS yuav siv cov neeg txhais lus thiab qhov Language Line. Tus neeg txhais lus yog ib tug uas kawm los pab kev txuas lus rau cov neeg uas hais lwm hom lus rau thaum xav tau kev pab, feem ntau yog tam sim ntawd. 

MDE LUB NTSIAB LUS: Tus neeg txhais lus yog ib tug uas mloog ib co lus thiab muab txhais mus rau lwm hom lus tsis pub hloov, ntxiv li nws xav, los sis thau ib cov pov tseg.

Thaum muaj xwm txheej ceev thiab tsis muaj neeg txhais lus, tej zaum tsev kawm ntawv yuav siv cov neeg ua hauj lwm uas hais tau ob hom lus los pab txuas lus nrog cov tsev neeg. Kev sib txuas lus txhais tau tias xa los sis qhia tias muaj dab tsi tshwm sim—xws li nrog tham, sau ntawv, piav tes, los sis lwm yam.

Yog tias qhov xwm txheej ntawd yuav tsum sau ntawv, ces mam li muab cov ntawv txhais ua hom lus uas cov tsev neeg hauv lub tsev kawm ntawv siv, thiab xa mus rau lawv.
 

Cov Neeg Ua Hauj Lwm Tes Dej Num Thiab Kev Thaj Tsob

• Cov neeg ua dej num hauv chav ua hauj lwm yuav tsum paub tias yuav nrhiav neeg txhais lus li cas, paub siv qhov Language Line thiab kev pab txhais ntaub ntawv.
• Cov xib fwb thiab cov thawj coj yuav tsum thov cov kev pab no thaum npaj rooj sib tham los sis xa cov ntaub ntawv tseem ceeb mus rau cov tsev neeg.
• Cov neeg pab kev kawm thiab cov neeg cev lus (liaisons) uas hais tau ob hom lus yog cov neeg ua hauj lwm hauv tsev kawm ntawv uas pab txhawb cov tsev kawm ntawv uas muaj ntau tsev neeg xav tau kev pab txog lus.

Cov Neeg Ua Hauj Lwm Hauv Lub Hauv Paus Tsev Kawm Ntawv Lub Luag Hauj Lwm

Kev Pab Txhais Ntawv

Pab kws txhais ntawv hauv lub chaw hauj lwm Office of Communications pab txhais ntawv rau cov tsev neeg ua lus Hmoob, Somali, Mev, thiab Karen, thiab lwm hom lus raws li thov tuaj. Lawv kuj saib xyuas koog tsev kawm ntawv cov xov tooj pab cuam los sis phone lines rau cov hom lus no thiab. Tsis tas li ntawd, lawv tseem siv lawv txoj kev txawj thiab kev paub los pab npaj txoj kev sib txuas lus ua ntau hom lus kom txoj kev sib txuas lus nrog ntau haiv neeg hauv zej zog muaj txiaj ntsig zoo, qhib rau sawv daws, thiab hwm txhua haiv neeg tej kab lis kev cai.

Kev Txhais Ntawv thiab Txhais Lus Rau Kev Kawm Ntawv Tshwj Xeeb

Lub chaw hauj lwm pab rau kev kawm ntawv tshwj xeeb (Office of Specialized Services, OSS) ntiav thiab muaj ib pab neeg txhais lus rau Kev Kawm Ntawv Tshwj Xeeb rau plaub hom lus uas siv heev tshaj hauv peb koog tsev kawm ntawv, xws li Hmoob, Somali, Mev, thiab Kasliam. Pab neeg txhais lus no txhais cov ntawv ceeb toom ua ntej (Prior Written Notice) thiab txhais txhua yam kev sib tham thiab cov txheej txheem raws li txoj cai (due process) rau cov tsev neeg thoob plaws hauv SPPS uas xav tau kev pab txhais ntaub ntawv thiab txhais lus. Rau lwm hom lus, OSS siv cov neeg txhais lus hauv Daim Ntawv Teev Cov Neeg Txhais Lus Uas Hu Tuaj Raws Li Xav Tau (On-Call Interpreter List) thiab lwm lub koom haum hauv zej zos uas muab kev pab txhais lus raws li daim ntawv cog lus nrog SPPS. 

Cov Kws Txuj Kab Lis Kev Cai Hauv Lub Hauv Paus Tsev Kawm Ntawv Lub Luag Hauj Lwm

Chav hauj lwm Office of Family Engagement & Community Partnerships muaj plaub tug kws txuj kab lis kev cai nyob rau hauv lub hauv paus tsev kawm ntawv. Lawv yog cov txuas lus tseem ceeb ntawm cov neeg ua hauj lwm hauv tsev kawm ntawv thiab cov tsev neeg uas hais lus Hmoob, Karen, Somali, thiab Mev. Lawv ua hauj lwm ze nrog pab Parent Advisory Councils thiab koom tes nrog cov tsev kawm ntawv los pab txhawb tej kev pab uas cov tsev neeg hais ntau hom lus xav tau, tsim kom muaj kev sib raug zoo, thiab pab xyuas kom txhua tsev neeg muaj kev sib txig sib luag rau txoj kev kawm thoob plaws rau hauv koog tsev kawm ntawv.

Ntxiv rau qhov no, cov kws txuj kab lis kev cai muaj ib txoj hauj lwm tseem ceeb uas yog los tsim kom muaj ib qho chaw uas tos txais zoo thiab suav txhua tus, kom txhua tsev neeg hnov tias lawv tau txais kev txhawb nqa zoo thiab muaj feem. Lawv kuj pab kom cov neeg ua hauj lwm hauv tsev kawm ntawv nkag siab txog ntau haiv neeg tej kab lis kev cai thiab cov tsev neeg uas siv ntau hom lus tej kab ke ua neej thiab kev paub dhau los. Qhov nov yuav pab tsim kom muaj ib lub zej zog tsev kawm ntawv uas hwm ntau haiv neeg tej kab lis kev cai thiab txuas tau zoo rau txhua tsev neeg.

Family Engagement Cov Kev Pab Txog Ncauj Lus Rau Cov Tsev Neeg

Kev pab txog ncauj lus rau cov tsev neeg yog kev txhawb kom cov tsev kawm ntawv, cov khoos kas, thiab cov chaw hauj lwm siv tau cov neeg txhais lus (On-Call Interpreters) thiab kev pab txhais lus hauv xov tooj (Language Line), kom cov tsev neeg muaj peev xwm koom tes tau rau lawv cov me nyuam txoj kev kawm. 

Qhov Language Line (Txhais Lus Hauv Xov Tooj) yog ib qho kev pab uas SPPS them nyiaj rau lawv los pab cov neeg ua hauj lwm hauv tsev kawm ntawv txuas lus hauv xov tooj los sis yas duab (video) nrog cov niam txiv thaum tsis muaj cov neeg uas pab txhais lus tim ntsej tim muag. Txhua lub tsev kawm ntawv thiab txhua fab feem (department) muaj peev xwm siv tau qhov Language Line no. Qhov chaw hauj lwm rau tsev neeg (Office of Family Engagement) yuav pab saib xyuas kom txhua lub tsev kawm ntawv muaj kev kawm thiab txawj siv qhov kev pab no.  

Cov Neeg Txhais Lus Uas Hu Tuaj Thaum Xav Tau Kev Pab (On-Call Interpreters) yog ib co neeg txhais lus uas npaj txhij los pab thaum niam txiv thiab xib fwb muaj rooj sib tham, muaj kev ua ub no hauv tsev kawm ntawv, muaj sib ntsib thiab lwm yam. Cov neeg ua hauj lwm hauv tsev kawm ntawv muaj feem mus saib daim ntawv uas teev cov neeg txhais lus uas muaj kev kawm thiab tau cai txhais lus los pab rau txhua seem kev txuas lus raws li xav tau.  

Saint Paul Public Schools (SPPS) yuav saib thiab ntsuam xyuas qhov kev pab no tsis tu ncua kom paub tseeb tias pab tau raws li cov kev xav tau ntawm peb cov tsev neeg uas hais ntau hom lus. Ob xyoos twg, SPPS Cov Tsav Xwm Kev Kawm Ntawv yuav rov muab cov kev pab no los tshuaj xyuas thiab kho tshiab kom zoo dua qub.

Tsoom zej zog tej lus thiab tswv yim tseem ceeb heev rau SPPS. Peb mob siab npaj kev pab txog ncauj lus kom zoo thiab muaj txiaj ntsig rau txhua tus. Yog nej leej twg xav tias nej tsis tau txais kev pab txog ncauj lus los sis kev pab raws li tej kev tsis taus uas piav tseg rau hauv Txoj Kev Pab Rau Kev Siv Lus no, es ua rau nej siv tsis tau SPPS cov khoos kas los sis cov kev pab cuam raws li tsim nyog, nej muaj cai sau ntawv thov kom rov xyuas dua (formal appeal). Yog nej muaj lus xav hais los sis xav ua daim ntawv tsis txaus siab, thov tiv tauj:

Sara Reyes
Email: sara.reyes@spps.org
Xov tooj: 651-744-2769
Chaw Nyob: 360 Colborne Street, Saint Paul, MN 55102